Handleddpuls og meir garn

Det er blitt litt småstrikk igjen. Denne gongen så smått at eg kallar dei for handleddpuls. Dei er berre 9 cm lange, og veg  9 gram. Dei kan brukast både til pynt og til nytte.

Dei er strikka av merinoull.

Så har eg spunne merinoull i ein nydeleg grønfarge. Det er 41 gram, og ca. 249,20 meter. Både den og handleddpulsa blir lagt ut på Epla.

Litt meir spinning og strikking

Har strikka eit par pulsvantar til i blå Merinoull som eg har spunne. 

Dei har allerede fått seg  ny eigar.

Så er det blitt to nye hesper i forskjellege fargar. Den til venstre er ca. 228,2 meter, og veg 43 gram. Den til høgre er ca. 224 meter, og veg 40 gram.

Hespa til venstre er tvinna saman av desse to spolane i ulik farge.

Pulsvantar igjen

Eg har nok litt dilla på å strikka pulsvantar for tida. 

Det er koseleg småstrikk, og det går lite garn med til eit par. Desse veg berre 19 gram, og er strikka i  mjuk og god Merinoull.

Og når eg har spunne garnet sjølv, er det ekstra kjekt å setja seg ned og strikka av det. På grunn av at fargeskifta ikkje er like lange, så blir det ikkje like mange omgongar av dei ulike fargane når eg strikkar av det heller. Men det er noko av sjarmen med å strikka med slikt garn. 

Ei riktig god påske til alle som er innom :)

Pulsvantar igjen

Har strikka eit par pulsvantar til av garn som eg har spunne. 

Denne gongen kombinerte eg perlestrikk og flette.

Garnet eg har spunne, er mjuk og kløfri Merinoull, og fargen er djupare raud enn det som viser. Str. er S/M, og dei blir lagt ut på Epla.

Litt spinning igjen

No har eg kost meg med litt spinning igjen, og det er verkeleg godt å setja seg ned med rokken. Ser det er mange som spinn som seier det same, og eg er heilt enig i at spinning er  meditasjon :) Det kan  anbefalast :)

Først vart det ei hespe der eg har blanda tre ulike fargar. Det er forholdsvis lange fargeskift, der fargane går over i kvarandre, og skiftar mellom einsfarga og melerte parti. Friske fargar som  det skal bli spennande å bruka. Den er 49 gram, og ca. 243,60 meter.

Så har eg spunne ei hespe med med ein nydeleg mørk lilla farge. Den er 48 gram, og ca. 250,60 meter. Den er lagt ut på Epla.

Pulsvantar til våren

Har strikka eit par pulsvantar til med sjølvspunne garn. Fine å bruka no når det vårast .

Det er mi eiga oppskrift, både desse og dei i innlegget under. Som de ser, er dei for store til meg, for dei er vel i ca. str. M / L. Dei blir lagt ut på Epla.

God helg til alle som er innom bloggen min :)

Pyntepuls

Har hekla eit par pyntepuls av den blå fiberen som eg har spunne. Det vil sei, eg strikka eit brot først, og så hekla eg vidare ut frå det. 

Det er 100 % merinoull, ei mjuk, god og kløfri ull.

Dei blir lagt ut på Epla i løpet av kvelden.