Pyntepuls og sjal.

Eg føler nok at eg gjentek meg sjølv for tida, for her er enda eit sjal i same oppskrift som dei to forrige. Dette er spunne av 50% ull, og 50% soyasilke, så det har ein fin glans. Det er litt større enn det lilla i forrige innlegg. Det er enkelt å forlenga mønsteret dersom eg vil ha eit større sjal.

Så har eg strikka pyntepuls i likt mønster som sjala. Fint å bruka som eit sett. Dette og er lagt ut på Epla.

Enda eit sjal.

Dette sjalet er og strikka i 100% merinoull. Eg har spunne ein spole med lilla, og ein med grå, som gjer ein fin melert effekt. Det er litt større enn det første som eg strikka. Dette har eg tenkt å selja på Epla.

Det er lett og mjukt å ha på, og er strikka på pinne nr. 4.

Enda eit sjal

Det var kjekt å prøva å strikka sjal med si eiga oppskrift, så eg har strikka eit til.

Sjalet er mjukt og lett, og veldig behageleg å ha på.

Det passa godt som trekantsjal i halsen, men det var litt lite til å ha rundt skuldrane. Derfor vil eg strikka eit til som er litt større.

Eg har spunne det av merinoull, og tvinna saman to spolar i ulik raudfarge.

Vekta denne gongen vart 51 gram.

Sjal igjen.

Fekk lyst til å prøva å strikka eit sjal utan å bruka andre si oppskrift. Ville ha det luftig og lett.

Det vart eit enkelt mønster.

Merinoulla er utruleg mjuk og god å bruka til sjal, og denne gongen vart det ein farge som heiter isblå.

Som dei andre sjala, er dette og strikka på pinne nr. 4, og som de ser, brukte eg berre 50 gram.

Shetland triangle shawl

Dette er det andre Shetland triangle sjalet eg strikkar. Det første finn du i eit innlegg lenger nede i bloggen. Kjekt å variera med forskjellege fargar, og sjå kor ulike sjala blir.

Dette garnet er spunne av 50% ull, og 50% soyasilke, som gjer ein fin glans.

Her ser du kor mykje garn eg brukte på sjalet.

Endå eit Ishbel sjal.

Synest Ishbelsjalet er så fint, at då eg hadde spunne garn til eit sjal til, så fall valet på det enda ein gong. Denne gongen i ein anna farge. Det første eg strikka , er i eit innlegg lenger nede i bloggen.

Her spann eg først ein spole med merinoull. Den tvinna eg saman med ein spole bomullstråd, som kan brukast til tvinning og effektar. Dette strikka eg sjalet av.

Artig å sjå kvar gong kor mykje garn eg brukar på dei ulike sjala.

Ulmussjal

Så var det Ulmussjalet sin tur til å bli strikka. Her spann eg pelsull som det blir ein fin melert effekt av. Det kvite er ein rest shetlandsull som eg hadde igjen av Multnomahsjalet, som er i eit innlegg lenger nede i bloggen.

Det er så kjekt å prøva seg fram med ulike ullsortar, og sjå korleis resultatet blir. Dette og er strikka på pinne nr. 4.

I dette sjalet har det gått med mest garn av dei som eg har strikka, men så lenge ein brukar under 100 gram, så synest eg det er lite som går med til å strikka eit sjal.